بسم الله الفتاح
اتعودت كتير على الوضع دا
يا ما كانت بتقابلنا عقبات ونقف ونواجهها بكل قوة
كنت بكون فى غاية السعادة وانا بسمع صوت من جوايا
بيقول خلاااااااااص فرجت
مبيبقاش همى ساعتها غير انى افتكر اللحظات الصعبة
اللى مرت دى واحاول الاقى الحكمة فى الاختبار دا ايه
ببقى على يقين تام وانا بمر باى ازمة ان الفرج جاى
وتستشعر دا وانت رافع ايدك لربنا وبتقول باعلى صوتك
يا فتااااااااااااح .
مرت التجربة دى عليا كتير قوى
وكان كل مرة بتبقى مختلفة فى الحجم عن المرة اللى قبلها
على الجانب الاخر الفرج بيكون على قدر الابتلاء
خلونى اديلكم مثال
كنت مرة مسافر فى معرض وحصل ظروف كتير قوى
ادت الى ان مفيش حد من اصحابى هيطلع معايا
احنا اساسا كنا بنروح السفريات دى علشان نبقى مع بعض
المهم انا استخرت ربنا وطلعت المعرض وكنت متضايق جدا
مقولكوش بقى على كم المشاكل اللى قابلتنى هناك
ومع كل مشكلة كانت بتزداد الامور تعقيدا
ماهو مفيش بقى حد معاك والعملية بايظة خالص
كانو تقريبا كدا من اسوأ خمس ايام فى حياتى
اللهم انى مكنتش عاوز افتكرهم
تخيلوا بعد كدا ان الايام دى بقت من اهم الايام فى حياتى تأثيرا
بعد المعرض دا وبفضل ربنا
اتيحت ليا فرص كتير قوى مكنتش احلم بيها
منها انى سافرت تونس
اللى قضيت فيها فعلا ايام من اجمل ايام انا عشتها
حسيت ساعتها قد ايه ان الاختبار كان صعب
وكان المقابل لكدا هو الفتح اللى بعده
مرة تانية
كان عندى شغل كتير قوى فى اسبوعين ورا بعض
وبلا مبالغة
كل حاجة فى الشغل من اصغر حاجة لاصغر حاجة كانت بايظة
انا اياميها والله كنت هتجنن
ليه المرادى كدا وبالصعوبة دى
مع انى معملتش حاجة غلط وكنا بنعمل عمل خير
فاجاة تلاقى كل الناس ضدك
واللى معاك ومسنود عليهم باعوك
والظروف مش سايباك فى حالك
حتى الحكومة بتعاند معاك
وكنت فى غاية الشغف والانتظار لما سيحدث
بعد هذه المحنه الشديدة
بفضل ربنا
يوم الخميس اللى فى اخر الاسبوعين بتوع الشغل
بقى افضل يوم فى حياتى
فى اليوم دا سمعت احلى خبر ممكن اسمعه فى الدنيا
كمان فى اليوم دا كسبت مجموعه جديدة
من الناس ربنا بجد بعتهملى هدية ليا فى الدنيا
اسأل الله ان يجمعنا فى الجنة
طيب
انا بقى بكتب الموضوع دا ليه
علشان المرادى العملية طولت
قوى قوى قوى قوى قوى قوى
والحمد لله
لدرجة ان كل حاجة عادية مبقتش عادية
كل حاجة كانت بتدفعك للامام
بقت بتسحبك للخلف
حالة شلل للتفكير
عارف لما توصل لمرحلة
انك بتكتب
1+1
وتيجى تضغط يساوى
متطلعش
2
وتطلع اى حاجة تانية
لنفس الدرجة انا وصلت دلوقتى
كل حاجة حواليا بقت كدا
وانا فى حالة من الذهول الشديد
اللهم لك الحمد على كل حال
الموضوع بدأ واحده واحده
شوية الشغل
شوية البيت
شوية الاصدقاء
شوية الصحه
شوية الماديات
ومازال الموضوع يتزايد
لدرجة انى لم اعد اتخيل
يا ترى يا ربنا
ايه حجم الفرج اللى جاى دا
يا ترى هيبقى اييه؟!
يا ترى؟!
استنونى فى الموضوع الجديد
" فرجت وكنت اظنها تفرج بإذن الله "
ويا رب تفتكروا تدعولى
azayem
هناك 6 تعليقات:
على قدر أهل العزم تأتي العزائم
وتأتي على قدر الكرام المكارم
وتعظم في عين الصغير صغارها
وتصغر في عين العظيم العظائم
بإذن الله يا عم أحمد الفرج هيكون كبيير على قدر الصبر والشكر والاحتساب
ربنا يكرمك وييسرلك الحال يارب
نصيحة من أخ أدخل على تخصيص واحذف موضوع تأكيد الكلمة من التعليقات عشان دا بيخلي ناس كتير تزهق من كتابة التعليق
لا تنس قول الله " إن مع العسر يسرا "
و اعلم ان شكر الله وحمده عند المحن له أجر وثواب أكثر من شكره وحمده عند المنح.
" الذين إذا أصابتهم مصيبة قالوا إنا لله و إنا أليه راجعون أولئك عليهم صلوات من ربهم و رحمة و أولئك هم المهتدون "
فاصبر واحتسب و فرج الله قريب
ربنا يخليك يا مالك
جزاك الله كل خير
انا غيرت الاعدادات زى ما انت قولت يا باشا
اشكرك بشدة يا Dash
اللهم انا نسألك الجنة وما يقرب اليها من قول و عمل
ياصاحب الهم إن الهم منفرج .. أبشر بخير فإن الفارج الله
لا حزن يدوم ولا سـرور
ولا بؤس عليـك ولا رخـاء
إذا ما كنت ذا قلـب قنـوعٍ
فأنت ومالـك الدنيـا سـواء
سبحان الله
هذا هو حال الدنيا
إرسال تعليق