مندوب مبيعات ع الباب
صاحبى يا حبيب قلبى
فينك ياعم واحشنى والله
ها يا سيدى ايه الاخبار ؟
يا ترى انت عامل ايه معاك ..
بتراعيك وواخد بالك منك ولا سايب الامور تخبط فى بعضها .؟
شفت يا عم اللى حصلك من كام يوم ... وفضلت تفكر طول الليل يا ترى ليه دا حصل ؟!!
ها وصلت لاجابة ولا لسه موصلتش ؟
عندى ليك مفاجآه ..
انا لقيتلك الاجابة على استفسارك دا ؟
والموضوع بقى سهل قوى قوى انك تعرف اللى بيحصل دا حصل ليه ؟
كل اللى عليك تعمله انك تشترى المنتج بتاعنا
احنا النهارده بنقدملك عرض جاااااااامد جدا وخصومات كتير على كل قطعه تشتريها ..
خلى بالك احنا مش بتوع كلام وخلاص واعلانات
زى القناة اسمها ايه دى اللى طول النهار
عمالين يبيعوا فى حلة مفيش زيها فى الدنيا
علشان ليها ايدين سبحان الله
واللحاف اللى لما تحطه ع السرير متشفش الملايه من تحته........
نرجع لمنتجنا احنا بقى
هو تقريبا كدا هيبقى عامل زى كمبيوتر صغير
او وحدة كنترول بسيطة الاستخدام
يعنى هتدخل السؤال
هتطلعلك الاجابة بسرعه
المنتج بتاعنا هو
" منظومة العدل الإلهى "
ايه بقى منظومة العدل الالهى دى ؟
اقولك
فاكر يا عمنا لما فى مره كدا كنت ماشى بتعاكس واحده فى الشارع
والموضوع عدى خلاص ومحصلش حاجة
وروحت البيت نمى الى علمك من مصدر او باخر
او يمكن انت معرفتش بس صدقنى لو سألت هتلاقيه حصل
ان اختك حد ضايقها وهى ماشيه فى الشارع النهارده ؟؟
خلينى احكيلك قصه صغننه
زمان كان فى راجل جواهرجى كان محترم
شوشو حب يلعب فى دماغه فى يوم
وقاله البنت دى حلوه قوى وانت بتديها الاسوره امسك اديها
الراجل سمع كلام شوشو وعمل زى ما قاله
البنت معلقتش ومحصلش اى حاجة
فى نفس ذات الوقت
اشتغلت منظومة العدل الالهى
وطلعتلنا ناتج جديد
مراته كانت فى البيت والباب خبط
راحت تفتح لقت الراجل السقا اللى بيجيب المايه كل يوم
الراجل السقا دا محترم برده
فاجاة كدا وهى بتاخد منه المايه
مسك اديها
والموضوع عدى والسقا مشى
الست اتعجبت قوى دا راجل محترم وبقاله زمن مشفناش منه حاجة وحشه
فلما رجع جوزها الجواهرجى من بره
حكتله اللى حصل
الراجل انهار من البكاء
فزوجته بتسأله خير فى ايه ؟
قالها
كما تدين تدان
فعلت كما فعل السقا
ولو زدت لزاد السقا
هى دى يا باشا منظومة العدل الالهى
ان كل حاجة بالمللى هتعملها هتاخد زيها
يعنى لو انت بصيت بس
العقاب هيكون نظره لاخته
شوف بقى انت بتعمل ايه فى حياتك
وروح اسال اختك
وصدقنى هتتاكد ان المنظومة شغاله
وخلى بالك
يمكن ربنا يعينلك العقاب
دا لزوجتك او خطيبتك
بس اللى عاوزك تتأكد منه ان
اللى بيحصل بالظبط دلوقتى
هو نفسه اللى بيحصل لاهلك
كمان فى حاجة
منظومة العدل الالهى مش بس
بتشتغل ع الجاحات اللى فيها معصيه
لا
دى كمان بتشتغل ع الحسنات والحاجات الكويسة
يعنى ايه ؟
فاكر لما وانت ماشى مره وساعدت
واحد كان بيشيل حاجة ومش قادر يشيلها
منظومة العدل الالهى بتقولك لازم
تكون متأكد ان الموقف دا هيتردلك
ولا لما كنت ماشى وشيلت قشرة الموز
اللى كانت ممكن تزحلق حد
على طول هتلاقى فى طريقك حاجة تكعبلك
وهتاخد بالك ومش هتتخبط ..
كمان منظومة العدل الالهى بتوضحلنا معانى جميلة قوى
يا ترى مش عاجبك ايه فيك ؟
ان انت مثلا معندكش عربية ؟
اوك المنظومة مستعده
توفرلك عربيه زى صاحبك حسام بس بشرط
انت ربنا هاديك وبتصلى الخمس اوقات فى ميعادهم
بس حسام بيقصر فى الصلاة
والمنظومة بتقول ان كل حاجة قصادها حاجة
يعنى لو موافق ان يبقى
عندك عربية بس مقصر شوية فى الصلاه
حسام بيتمنى انه ميبقاش عنده عربية
بس يبقى محافظ ع الصلاه
طب واحد يقولى
طب انا عاوز العربية والصلاه
اقوله لا يا حلو
-" مثال توضيحى وليس نصا"-
ما هو انت مش بتختار وتقسم على مزاجك
البيعه كلها على بعضها ربك مقسمها
بمنتهى العدل
بمعنى
لو مش عاجباك حياتك اللى
كلها ضغوط ومشاكل وصعاب
وبتدور على الحياة المرفهه زى زميلك توتو
حلو احنا موافقين
بس متطلبش ان شخصيتك القوية المحبوبة بين الناس
دى تفضل معاك ..
كمان استخدام من استخدامات المنتج بتاعنا
انه تقدر تعرف الناس بتعمل معاك كدا ليه
يعنى انت دايما جواك شكوك ان الناس بتكدب عليك
مدى لواحد معاد ومجاش
تلاقيه بيقولك معلش اصل بابا اتصل بيا وعاوزنى
وانت جواك شك هيموتك انه هو بيكدب
منظومة العدل بتقولك
ان عمر الشك دا ما هيوصل كدا
غير اذا كنت انت فعلا بتكدب
على اصحابك التانين
وعلى فكرة باباه متصلش بيه ولا حاجة وهو كداب
بس هى دى القوانين
والاستراتيجيات اللى بتتحكم فى سير المنظومة
شوف بقى وقيس على حياتك كلها
مادة مش فاهمها .. ,
موقف محرج اتحطيت فيه ...,
انسان باعك ونفضلك ...,
وهكذا وهكذا
كل دى حاجات بتشغل دماغنا
ومش عارفين ليه
مع المنتج بتاعنا النهارده كل المشاكل دى محلوله
ها يا ترى هتاخد كام قطعه من المنظومة دى ؟
صدقنى الحياة زى ما انت عاوز تعيشها
هتعيشها
وبايدك تختار من دلوقتى والكوره فى ملعبك
انصحك
دور ازاى تبقى سعيد
وصدقنى بعيد عن ربنا مفيش اى سعادة
azayem
هناك 3 تعليقات:
جااااااااااااااااااااااامد قوى
الموضوع ده يا ريييييييييييييييس
اصل الواحد ساعات بيعمل حاجة هوه عارف انها غلط
وبالتالى بيبقى عارف انها هتتردله
عشان كده اول لما ده يحصل
بيفتكر على طول الغلط اللى هوه عمله
ده لو هوه بيراجع اخطائه مع نفسه
ناس تانية بقى بتغلط وخلاص خصوصا اننا اتعودنا مش عارفة ليه نعدى لروحنا الاخطاء الصغيرة لحد ماتبقى الطبيعى بتاعنا
الناس ديه برده بتسال روحها اول ميتردلها غلطها
هوه انا عملت ايه فى دنتيتى يارب عشان يحصلى كده؟
وبرده لما حد بيعمل خير فى حد تلاقى الناس تدعيله
يقعد لك فى صحتك وعافيتك يارب
الهى يقعد لك فى ولادك
بس السؤال بقى هوه:
يا ترى معنى كلامك عن توتو ان الواحد يبطل يحلم انه يغير الجزء اللى مش عاجبه فى حياته مع احتفاظه بالجزء الحلو اللى عاجبه فيها؟؟؟؟!!!
طب ازااااااااااى؟
اذا كان حلم التغيير هوه الامل اللى بيخليك تستحمل وتقدر تكمل
بسم الله الفتاح
بداية اشكرك يا داليا على التعليق بتاعك
وكنت عاوز اضيف حاجة بسيطة
سؤالك دا مهم جدا
وناس كتير سالته
خلينى ارد عليه فى الموضوع الجديد
سلام عليكم
سيدنا النبي بيقول
واعلم أن ما اخطأك لم يكن ليصيبك وما اصابك لم يكن ليخطأك
كل حاجة مقدرة ومكتوبة
وكمان ربنا ليه حكمة في كل حاجة بتحصل حوالينا
خير ان شاء
:)
سلام
إرسال تعليق